Menjëherë pas largimit nga presidenca, Donald Trump thuhet se ndau informacione konfidenciale për nëndetëset bërthamore amerikane me një biznesmen australian gjatë një bisede miqësore në Mar-a-Lago, klubi dhe rezidenca private e Trump në Florida.

Biznesmeni australian Anthony Pratt, miliarder dhe anëtar i klubit Mar-a-Lago, pronar i një prej industrive më të mëdha të kartonit në botë, ua transmetoi shumë të njohurve të tjerë informacionin interesant për nëndetëset. Këto zbulime nga Trump, vlerësojnë ekspertët, kanë rrezikuar potencialisht flotën e nëndetëseve bërthamore amerikane. Ekipi i këshilltarit të posaçëm Jack Smith është informuar për zbulimet e Trump për Pratt, të cilin e ekzaminoi si pjesë e hetimit për trajtimin e dokumenteve të klasifikuara nga ish-presidenti. Pratt është tani një nga 80 dëshmitarët e mundshëm të prokurorisë në çështjen e dokumenteve të klasifikuara Mar-a-Lago. Gjyqi do të fillojë në maj në Fort Pierce, Florida.

Dëshmia e Pratt do t’i ndihmojë prokurorët të konfirmojnë se Trump përdorte dokumente të klasifikuara pa kujdes, mbajti në mënyrë të paligjshme shumë prej tyre pasi u largua nga Shtëpia e Bardhë dhe pengoi përpjekjet e autoriteteve gjyqësore për t’i tërhequr ato. Në bisedën e tij me Pratt, Trump zbuloi të paktën dy pjesë kritike të informacionit në lidhje me aftësitë operacionale të nëndetëseve me fuqi bërthamore të Marinës së SHBA: numrin e raketave që çdo anije mbart dhe sa larg mund të shkojnë nëndetëset ruse pa u zbuluar. Por Trump nuk i tregoi Pratt dokumentet top-sekret, të cilat ishin në ruajtje në rezidencë.

“Nëse ata vetëm diskutuan për këtë, atëherë nuk ka asnjë problem. E gjithë kjo dihet. Detarët australianë kanë shërbyer në nëndetëse amerikane në shkëmbime stërvitore, ne ndajmë të njëjtën teknologji dhe sisteme armësh,” tha ish-ambasadori australian në Uashington, Joe Hockey.

Por Trump është i njohur për gabime të tilla. Menjëherë pasi drejtori i FBI-së James Comey u shkarkua, Trump zbuloi informacione të klasifikuara për dy zyrtarë rusë në një takim në Zyrën Ovale. Në vitin e tretë të presidencës së tij ai postoi një mesazh në X me një foto të objekteve raketore iraniane.

Aktakuza në çështjen e dokumenteve të klasifikuara kundër Trump pretendon se ish-presidenti tregoi një plan të fshehtë operacional për një sulm kundër Iranit për mysafirët në fushën e golfit të Trump në Bedminster, New Jersey. Dëshmitarët okularë dëshmuan se Trump po tundte fletët e letrës, duke thënë se ishte e gjitha e klasifikuar. Joe Biden përfundoi informimet e sigurisë kombëtare që të gjithë ish-presidentët u takojnë pas sulmit në Kapitol. “Mendoj se nuk nevojitet përditësim. Çfarë të mirë do të bënte kjo? Gjithçka që ai mund të bënte është të largohej me të”, tha Biden.

Kontaktet Trump-Pratt filluan kur manjati australian u bë anëtar i Mar-a-Lago në 2017. Ai u ftua menjëherë në Shtëpinë e Bardhë dhe më pas shoqëroi Trump në një vizitë presidenciale në fabrikën e tij në Ohio./abcnews